تاند ( جمعه، د دلوې ۱۳ مه) د پاکستان ایکسپریس ټریبیون ورځپاڼې په دغه هېواد کې د ټي ټي پي یا تحریک طالبان پاکستان ډلې د بریدونو ټکنۍ شوې لړۍ ته په اشارې ویلي، چې په کابل کې د طالبانو واکمن رژیم د پاکستان د حکومت او ټي ټي پي ترمنځ منځګړتوب کړی.
دغې ورځپاڼې ویلي، چې دا خبره ورته باوري سرچینو کړې ده.
ورځپاڼه زیاتوي، چې یوازې د روان میلادي کال په لومړۍ میاشت کې ټي ټي پي ډلې په خیبر پښتونخوا کې د پاکستان د حکومت خلاف ۲۷ بریدونه کړي.
ټي ټي پي، د پاکستان حکومت او په کابل کې د طالبانو واکمن رژیم یوه هم په دې اړه څه نه دي ویلي.
د طالبانو رژیم تر دې مخکې هم د پاکستان د حکومت او تحریک طالبان پاکستان تر منځ د اوربند منځګړتوب کړی و.
پر دې سربېره، طالب رژیم بیا- بیا ټینګار کړی چې د دواړو لوریو د سولې لپاره د مذاکراتو د دوام منځګړتوب ته هم چمتو دی، خو د پاکستان چارواکو ویلي چې ټي ټي پي سره سوله نه کوي.
له دې سره، ایکسپریس ټریبیون ورځپاڼې ویلي چې اوسنی اوربند د پاکستان د پارلماني ټاکنو لپاره شوی.
معلومه نه ده، چې د دغه اوربند لپاره کوم ډول شرایط وضع شوي او په بدل کې یې ټي ټي پي یا د طالبانو رژیم د منځګړتوب لپاره څه امتیاز تر لاسه کړی؟
پاکستان په وروستیو کې بیا- بیا د طالبانو رژیم ټي ټي پي ته په افغانستان کې په پناه ورکولو تورن کړی، خو طالب چارواکو دا ادعاوې بې اساسه ګڼلي او ویلي چې د افغانستان له خاورې چا ته د خطر پېښیدو اجازه نه ورکوي.
څه موده مخکې د پاکستان د جمیعت علمای اسلام ګوند مشر ملا فضل الرحمان کابل او کندهار ته سفرونه وکړل او ویې ویل، چې د پاکستان او طالبانو د اړیکو ښه کیدو لپاره یې د طالبانو لوی مشر ملا هبت الله سره هم خبرې کړي او ښو پایلو ته رسیدلی.