تاند (سې شنبه، د جدي ۲۶ مه) د ملګرو ملتونو د بشري مرستو د همغږۍ اداره اوچا وایي چې په افغانستان کې د اقلیم د بدلون یو له څرګندو اغیزو څخه د اوبو کمښت دی، چې په روغتیا او کرنه منفي اغیزه کوي.
د اوچا په وینا، په ټول هیواد کې ۲۱ميليونه خلک پاکو اوبو ته لاسرسی نه لري او په ۳۰ ولايتونو کې د اوبو کیفیت خورا خراب دی.
سرچینې له نړیوالو غوښتي چې له افغانستان سره د بشري ناورین د مقابلې تر څنګ د اقلیمي بدلون د اغېزو د کمولو لپاره هم لازمې مرستې وکړي.
د طالبانو له بیا واکمنیدو سره، په افغانستان کې د اقلیمي بدلون د اغېزو په دوام یو شمېر خونړۍ او لویې طبیعي پېښې وشوې، چې سلګونه زره افغانان یې اغېزمن او زرګونه نور یې مړه او ټپیان کړل.
طالب چارواکو پر نړیوالو نیوکه کړې، چې د اقلیمي بدلون د اغېزو د مقابلې په برخه کې یې مرستې سیاسي کړي او دوی سره د مخالفت له امله یې افغانستان ته منظور کړې پروژې هم درولې دي.