تاند (شنبه، د جدې ۲۳ مه) عزیزي بنسټ د هرات زلزله ځپلو ته د شاوخوا ٣٠٠ کورونو د وېش خبر ورکړی.
د ياد شوي بنسټ مسوول، میرویس عزیزي د جنورۍ په ١٢مه په خپله ایکس پاڼه، لیکلي:
” معیاري ښارګوټی د څلورو میاشتو څخه په لږه موده کې بشپړ او خلکو ته وسپارل شو.”
د طالبانو ځایی چارواکو هم د دغو کورونو د جوړېدو خبر تایید کړی او د وېش په مراسمو کې یې ګډون کړی.
یو شمېر خلکو د عزیزي بنسټ د دې مرستې ستاینه کړې او ویلي، چې نور افغان شتمن دې هم له زلزله ځپلو او نورو افغان بېوزلانو سره په مرستو کې ونډه واخلي.
مخکې یو شمېر نورو خیریه بنسټونو او شتمنو هم د هرات زلزله ځپلو ته په کور جوړولو او نورو مرستو کې برخه اخیستې وه.