تاند (دوشنبه، د قوس ۲۷ مه) د طالبانو د رژیم چارواکي وایي چې له تېر یوه کال راهیسې د دوی په هڅو د پاکستان له بندخونو څه باندې ۳ زره کډوال خوشې او هېواد ته را اړول شوي دي.
په کراچۍ ښار کې د طالبانو کونسل عبدالجبار تخاري ویلي، له دې سره لا هم د سند ایالت په بندخونو کې څه باندې ۳۰۰ نور کډوال هم بندیان دي.
تخاری زیاتوي چې د تېرو دوو ورځو په لړ کې نږدې ۱۰۰ تنه افغان کډوال د سند ایالت له زندانونو خوشې شوي چې څه باندې ۳۰ تنه یې قانوني کډوال دي.
د پاکستان له بند خونو یو شمېر را خلاص شوي افغانان بیا هلته ورسره له شوي ناوړه چلنده شکایت لري.
پاکستاني چارواکو په دې اړه څه نه دي ویلي.
دغه هېواد په وروستیو کې په پرله پسې دول افغان کډوالو سره په ناوړه چلند تورنیږي او غوښتنې ترې کېږي چې خپل دا چلند بدل کړی، خو پاکستان په دې تړاو د افغانانو او نړیوالې ټولنې غوښتنو ته غاړه نه ده اېښې.