تاند (چهارشنبه،د قوس ۲۲مه) د راپورونو له مخې، د لغمان ولایت د الیشینګ ولسوالۍ په ځنګلونو کې پراخ اور لګېږي او د وژلو لپاره یې د ځايي اوسیدونکو هلوځلو نتیجه نه ده ورکړې.
د سیمې اوسیدونکي وايي چې په دغو ځنګلونو کې درې ورځې وړاندې اور بل شو او ورځ تر بلې پراخ شوی دی.
تر اوسه پورې د اور لګېدو علت نه دی څرګند خو ځینې کسان په ځنکلونو کې اور بلوي چې له کبله یې اور له کنټروله ووځي.
دوی له طالب چارواکو غواړي چې د اور په وژلو کې ورسره مرسته وکړي کنې نورو ساحو ته به هم پراخ شي.
په وروستیو څو کلونو کې د افغانستان د ختیځ، کونړ، نننګرهار او نورستان په ځنکلونو کې څو ځلې اورونه ولګېدل چې له کبله یې پراخې ساحې په ایرو بدلې شوې.
تر ټولو وروستۍ پېښه د سرطان په میاشت کې د کونړ او نورستان په ځنکلونو کې اور و چې بالاخره د ځايي خلکو او طالبانو په همکارۍ ووژل شو.
دا په داسې حال کې ده چې افغانستان د خپل مساحت په تناسب لږ ځنګلونه لري او له بلې خوا پر له پسې وچکالیو د نورو ځنګلونو د احیا کېدو مخه نیولې ده.
د الیشنګ ولسوالۍ د اوسیدونکو په وینا دا وخت په تیلي غر، میلي دره، ټپکال او د څو نورو غرنیو سیمو په ځنګلونو اور بل دی.
د دوی په وینا کلیوالو په ځینو ساحو کې اور وژلی خو تراوسه پورې لږترلږه ۴۰ جریبه ځنګل سوځېدلی دی.