تاند(پنجشنبه، د عقرب ۲۵ مه) په افغانستان کې د ملګرو ملتونو بشري مرستو همغږۍ دفتر (اوچا) د هرات زلزله ځپلو ته د ۱۷۳ میلیونه ډالرو ۶ میاشتنۍ مرستې غوښتنه کړې ده.
اوچا په یوه خبرپاڼه کې ویلي، راروان ژمي کې ۲۷۵ زره زلزله ځپلي خلک د سرپناه، خوړو، اوبو، نغدو پیسو، روغتیا او نورو بیړنیو ژمنیو مرستو ته اړتیا لري.
سرچینې دا غوښتنه داسې مهال کړې، چې تر دې مخکې هم د هرات زلزله ځپلو سره د غوښتل شویو مرستو لږه اندازه برابره شوې وه.
زلزله ځپلي تور پورې کوي، چې هم طالب چارواکي او هم نور مرستندویان د مرستو په وېش کې درغلي کوي، خو طالب چارواکو دا ادعا رد کړې ده.
د هرات د څو میاشتې مخکې زلزلو تر دوه زرو زیات کسان مړه، شاوخوا ۶ زره نور ټپیان او لسګونه زره بې کوره کړل، چې اوس په ډاګ میدان کې له ګڼو ستونزو سره د سړې هوا ستونزې ګالي.