تاند (پنجشنبه، د عقرب ۱۱ مه) د افغانستان یوه ځوان سندرغاړي میرخان مقري د کرکټ د ملي لوبډلې لوبغاړي فرید ملک ته په خطاب کې ویلي، چې د سپینو زرو خرڅیدونکی مېډال یې په ۳ زرو امریکايي ډالرو اخلي.
د هغه په وینا، یاد شوی مېډال به له پاکستان څخه ستنیدونکو افغان کډوالو ته ډالۍ کړي.
مخکې فرید ملک ویلي وو، چې خپل د سپینو زرو مېډال به خرڅ او پیسې به یې له پاکستان څخه ستنیدونکو افغان کډوالو ته ډالۍ کړي.
هېواد ته د افغان کډوالو له ستنیدو سره په ټولنیزو رسنیو کې له هغوی سره د مرستو لپاره پراخ کمپاینونه روان دي.
دا کمپاینونه په ځانګړي ډول په ننګرهار ولایت کې د ځوانانو، سوداګرو او ټولنیزو فعالانو له لوري ترسره کیږي.
راپورونه ښيي، چې د دغه ولایت خلکو تورخم ته د سلګونه کډوالو لپاره خوراکي مواد وړي او چمتو شوې ډوډۍ پرې وېشي.
ماشاءالله ، افغان ملت اوس دا ملي شعور لري چې خپله دارایی او ثروت یا په بل عبارت خپله ډوډۍ له غمځپلو او پنجاب نه راستنو شویو مظلومو هېوادوالو سره وويشي . دوی ته د الله تعالی توفیق ورکړي .