تاند (چهار شنبه، د میزان ۲۶مه) د پکتیکا په برمل ولسوالۍ کې د ملګرو ملتونو د کډوالو د عالي کمېشنرۍ له لوري د تېر کال زلزله ځپلیو ته زر کورونه له جوړیدو وروسته نن وسپارل شول.
په پکتیکا کې د طبیعي پېښو پر وړاندې د مبارزې طالب رئیس مطیعالله منصور ویلي چې پر دغو کورونو نږدې ۵میلیونه ډالره لګښت شوی.
د منصور په وینا، پر کور ۴۸۰۰ امريکايي ډالر لګښت راغلی چې جوړ شوي کور کې دوه د هستوګنې خونې، يو دهلیز، یو تشناب او پخلنځی شامل دی.
د یو شمېر نورو کورنیو لپاره د کرکټ مشهور لوبغاړي راشد خان هم د خپل خیریه بنسټ له لارې کورونه جوړ کړي وو.
دا په داسې حال کې ده چې زرګونه تنه نور افغانان د هرات په زنده جان ولسوالۍ کې وروستیو خونړیو زلزلو بې کوره کړي چې طالب چارواکو یې د کورونو د جوړولو ژمنه کړې ده.