تاند (شنبه، د میزان ۱۵ مه) یوې نسبتاً شدیدې زلزلې نن هرات ولایت او شاوخوا سیمې ولړزولې.
د جرمني د زلزله پېژندنې ادارې پر اساس د دې زلزلې شدت، چې د افغانستان په وخت په یوولس بجې او ۱۲ دقیقې وشوه، شپږ نیم ریښتره و.
د دې ادارې د معلوماتو له مخې، د زلزلې مرکز له مځکې ۱۰ کیلومتره لاندې و چې ډېر ژور نه دی او عموماً د هغو زلزلو شدت او په نتیجه کې یې زیان زیات وي چې مرکز یې ډېر ژور نه وي.
لویدیځو رسنیو ویلي چئ د زلزلې مرکز د هرات ښار د شمال ختیځ په ۴۰ کیلومترۍ کې و.
د امریکا د جیالوجیکي سروې د زلزلې شدت ۶ اعشاریه ۲ ښوولی دی.
په هرات کې د طالبانو د حکومت چارواکي وايي چې نن تراوسه پورې په هرات کې څلور زلزلې احساس شوي او دوی د معلوماتو په راټولولو بوخت دي.
د هرات د حوزوي روغتون سرچینې وايي چې تراوسه پورې دغه روغتون ته د دوو تنو مړي او ۵۵ ټپیان وروړل شوي دي.
وېره ده چې د مرګ ژوبلو شمېر به تر دې ډېر وي.