تاند (سې شنبه، د میزان۴مه) د پاکستان پوځ ادعا کوي چې د افغانستان پولې ته نژدې یې د پاکستاني طالبانو پر یوه پټنځای په برید کې ۳ طالبان وژلي دي.
پوځ نن په یوه خبرپاڼه کې ویلي چې په دې برید کې چې تېره شپه په خیبر ولسوالۍ کې وشو، د ټي ټي پي د یو قوماندان په شمول ۳ تنه وژل شوي دي.
د پاکستان پوځ د دې برید نور جزییات نه دي څرګند کړي خو ویلي یې دي چې دغو کسانو د پاکستان پر پوځیانو په پر له پسې بریدونو کې لاس درلود.
ټي ټي پي کابو هره ورځ پر پاکستاني پوځیانو او ملېشو د بریدونو خبر ورکوي خو د پاکستان پوځ او رسنۍ په دې اړه څه نه وايي، دوی یوازې هغه مهال چې د ټي ټي پي پر ضد یې عملیات کړي وي د ټي ټي پي د بریدونو یادونه کوي.
پاکستان د ټي ټي پي د حملو د مخنیوي لپاره پر افغان طالبانو فشار ډیر کړی دی.
د افغانستان د طالبانو د حکومت ویندوی ذبیح الله مجاهد ویلي چې هیڅ ډلې ته اجازه نه ورکوي چې د افغانستان له خاورې د بل هیواد پر ضد کار واخلي او تر خپله وسه له پاکستان سره د دغه هیواد په امنیتي چارو کې مرسته کوي.
ده ملي تلویزیون ته په عین حال کې وویل چې د طالبانو حکومت د پاکستان په خاوره کې له هغوی سره مرسته نه شی کولی او دا د اسلام اباد مسوولیت دی چې په خپله خاوره کې د خپل امنیت چاره وکړي.
په وروستیو کې داسې راپورونه ورکړل شوي چې طالبانو د ټي ټي پي یو شمېر غړي په کونړ کې نیولي او پلچرخي ته انتقال کړي دي. ظاهراً د مجاهد اشاره همدې مرستې ته ده.