د۱۹۷۳ كال د سپټمبر په نولسمه د سفرنامو ليكوال پال تيروكس (Paul Theroux) د لندن د ويكتوريا له سټېشن څخه د اروګادي په ذريعه د اروپا او آسيا په څلور مياشتني سفر ووت. د دې سفر بريا (The Great Railway Bazaar) كتاب يې په نولس سوه پنځه اويايم كې بشپړ كړ. دا كتاب د وخت يو تر ټولو زيات خرڅېدونكى كتاب شو.
د تيروكس پلار اووه اولادونه لرل، دى درېبم اولاد و او د ۱۹۴۱ كال د اپريل په لسمه زېږېدلى. د امريكا باسټن ته څېرمه د ماساچوسيت په ميدسن آرام ښار كې لوى شو. هغه له كوچينوالي د ذوق خاوند ؤ خو دا يې په زړه كې هم نه ؤ تېر شوي چې ليكوالي به كوي. وروسته له هغه چې د ماساچوسيت پوهنتون يې ولوست، د سولې له قوې سره ملګرى شو او په يوګنډا كې يې د انګريزي تدريس پيل كړ. هلته يې له يوۀ ليكوال وي. ايس نايپل (V.S. Naipaul) سره وپېژندل. نايپل تشويق كړ چې ليكنې وكړي او د هغه د نژدې ملګري په توګه يې د ډېرو كلونو لپاره د دۀ لارښوونه كوله. تيروكس وروسته په سينګاپور كې انګليسي ژبې تدريسوله او ډېر سفرونه يې وكړل.
په شل كلنۍ كې يې د ناولونو په چاپولو پيل وكړ. په ۱۹۶۷ كې يې (Waldo)، په ۱۹۶۹ كې يې (Girls at Play) او په ۱۹۷۳ كې يې (Saint Jack )چاپ كړل. د هغه لومړنى داستاني اثر (Great Railway Bazaar) ؤ چې ورپسې يې په ۱۹۷۹ كې يې (The Old Patagonia Express) خپور كړ. له وادۀ وروسته لندن ته ولېږدېدۀ. دوه زامن يې لرل. په لندن كې تر ځاى پر ځاى كېدو وروسته يې ليكوالۍ ته لا ډېر پام وكړ، ناولونۀ، لنډې كيسې او مقالې يې وليكلې. د هغه په وروستيو ناولونو كې (The Mosquito Coast) چې په ۱۹۸۱ كې چاپ شو او ورڅخه فلم جوړ شو. دغه راز په ۱۹۹۶ كې (My Other Life) يادولى شو. تيروكس دوبى په كېپ كوډ كې تېروي او تراوسه پورې يې تر څلوېښتو زيات كتابونه چاپ شوي دي.
|