تاند (چهارشنبه، د سنبلې ۲۹ مه) طالب چارواکي وايي چې په ختیځو ولایتونو کې یې د ډیورند کرښې په اوږدو کې تر سلو ډېرې پوستې جوړې کړي دي.
دا پوستې په کونړ، ننګرهار او نورستان ولایتونو کې جوړې شوي دي.
د افغانستان په ختیځ کې د سرحدي لوا قوماندان قاري معراج د ننګرهار حریت راډیو ته ویلي چې دا پوستې د دفاع وزیر ملامحمدیعقوب مجاهد په امر جوړې شوي دي.
ځینو پوستو ته سړکونه هم تېر شوي او پر ځینو کار روان دی.
د افغانستان تلویزیونونو هم پرون د دیورند کرښې په اوږدو کې د نویو پوستو او سړکونو د جوړېدو چارې وښودې.
د سرحدي لوا قوماندان قاري معراج ویلي چې د تېر جمهوري حکومت په مهال د افغانستان پوستې له ډیورند کرښې یا صفري نقطې ۱۵ کیلومتره لېرې وې او دولتي ځواکونه صفري نقطو ته نه شوای تللی.
څه باندې دوې اوونۍ پخوا په تورخم کې د یوې پوستې د جوړېدو پر سر د افغان او پاکستاني پوله ساتو ترمنځ نښته وشوه چې یو ساعت یې دوام وکړ او ورپسې پاکستان د تورخم لار د یوې اوونۍ لپاره وتړله.
که څه هم د تورخم دروازې د بندولو او د سرحدي شخړې دلیل وروسته پاکستاني رسنیو د چترال له حملو سره تړلې وباله خو ظاهراً پاکستان وویل چې د طالبانو حکومت د دوی د موافقې خلاف پوسته جوړوله.
تېره میاشت د طالبانو د حکومت لوی درستیز قاري فصیح الدین فطرت وویل چې دوی له ګاونډیو هیوادونو سره په پولو کې په یوه کال کې شاوخوا ۶۰۰ سرحدي پوستې جوړې کړي او د سرحدي ځواکونو شمېر یې ۴۴ سلنه زیات کړی دی.
د ده په وینا د افغانستان ۲۰ ولایتونه او ۹۰ ولسوالۍ له شپږو هیوادونو سره پوله لري او په دغو پولو کې نژدې ۶۳ کنډکونه، ۳۷ کمپونه، ۱۰۸ بېسونه او ۶۰۰ پوستې شته.