تاند (شنبه، د سنبلې ۲۵مه) پاکستاني رسنۍ ادعا کوي چې د پاکستاني طالبانو تحریک (ټي ټي پي) خپلو والیانو او قوماندانانو ته ویلي چې د افغانستان د اتباعو له جذوبولو ډډه وکړي.

د پاکستاني رسنیو پر اساس، د ټي ټي پي مرستیال دفاع وزیر مفتي مزاحم په یوه اعلامیه کې، چې کاپي یې دغو رسنیو ترلاسه کړې، ویلي چې د پاکستاني طالبانو د تحریک په لیکو کې د افغانستان د اتباعو شمولیت منع دی.

مفتي مزاحم په دې امر کې د پاکستاني طالبانو د تحریک د شمالي او جنوبي حوزو پوځي کمیسیون ته ویلي چې د افغانستان د اتباعو له جلب و جذبه ډډه وکړي.

د دې فرمان پر اساس، که چا سرغړونه وکړه، سزا به ورکړل شي.

تراوسه پورې کومې خپلواکې سرچینې د پاکستاني طالبانو په منځ کې د افغانستان د اتباعو ګډون تایید کړی نه دی خو د پاکستان حکومت د دې لپاره چې په پاکستان کې د ټي ټي پي نفوذ کم وښيي په ځلونو ادعاوې کړي چې د ټي ټي پي له لوري بریدونه د افغانستان اتباع کوي.

پاکستان د لارو د بندولو په شمول له بیلابیلو طریقو هڅه کوي چې د افغانستان طالبان تر فشار لاندې راولي څو له خپل نفوذه په استفادې پاکستاني طالبان له جګړې لاس اخیستلو او د وسلو تسلیمولو ته اړ باسي.

افغان طالبانو څو ځلې د پاکستان د پوځ او ټي ټي پي ترمنځ د پخلاینې لپاره د منځګړتوب هڅه وکړه خو د دوی خبرې بریالۍ نه شوې.