تاند(شنبه، د سنبلې ۱۸ مه) پاکستاني رسنیو نن د خپل هیواد د باندنیو چارو وزارت په قول راپور ورکړ چې دغه وزارت په اسلام اباد کې د افغانستان د سفارت استازی سرداراحمد شکیب په چترال کې د وروستۍ حملې په خاطر احضار کړی دی.
د تېرې اوونۍ د چهارشنبې په ورځ سلګونو پاکستاني طالبانو په چترال کې د پوځ پر دوو مهمو او لویو پوستو برید وکړ چې د دوی په وینا پاکستاني پوځیانو ته یې درنه مرګ ژوبله واړوله.
د پاکستان پوځ د خپلو څلورو سرتېرو وژل کېدا تایید کړې ده.
خو د پاکستان ځینې رسنۍ وايي چې لږترلږه ۱۲ پوځیان وژل شوي او دوې پوستې په کامل ډول د طالبانو له لوري نیول شوي دي.
ټي ټي پي ویلي چې لسګونه پوځیان یې ژوندي نیولي دي.
د پاکستان پوځ ته نژدې ایکسپریس تریبیون ورځپاڼې ویلي چې د پاکستان په باندنیو چارو وزارت کې د افغانستان د طالبانو سفیر ته په زغرده او قاطع ډول وویل شول چې د افغانستان له خاورې د ټي ټي پي دا ډول بریدونه د سولې او امنیت لپاره مضر دي.
د پاکستان پوځ ادعا کوي چې چترال د افغانستان نورستان، کونړ او بدخشان ولایتونو ته نژدې دی او پاکستاني طالبان له دغو ولایتونو څخه د حملې لپاره چترال ته ورغلي دي.
د طالبانو حکومت د پاکستان ادعا رد کړه، ویې ویل چې د افغانستان حکومت هیڅ ډلې ته اجازه نه ورکوي چې له خاورې څخه یې د بل هیواد پر ضد کار واخلي.
د ټي ټي پي وسله وال د خیبر پښتونخوا او شمالي بلوچستان په تقریباً هره سیمه کې بریدونه کوي خو دا لومړی وار و چې دوی په چترال کې برید وکړ.