تاند(سې شنبه، د اسد ۳۱مه) سعودي عربستان د عمرې د ادا کوونکو لپاره د یو شمېر هیوادونو اتباعو ته د ویزې اسانتیا رامنځته کړه.
د سعودي عربستان د نوې مقررې له مخې، د یو شمېر هیوادونو اتباعو ته به ، د هوا، اوبو او مځکې له لارې د سعودي خاورې ته له رسیدو سره سم د ۹۰ ورځو ویزه ورکول کېږي.
د اربین بیزنس ورځپاڼې د راپور له مخې، د سعودي د حج او عمرې وزارت وویل، سږ کال د اګست له شلمې څخه د امریکا د متحدو ایالتونو، بریتانیا، بیلابیلو اروپايي هیوادونو، استرالیا، کاناډا، نیوزیلنډ، سینګاپور، مالیزیا، جنوبي کوریا، جاپان، قزاقستان، برونای او چین وګړي اړتیا نه لري چې مخکې تر مخکې د سعودي ویزه واخلي بلکې د سعودي خاورې ته له رسیدو سره سم ۹۰ ورځینۍ ویزه ورکول کېږي.
أداء العمرة عبر التأشيرة عند الوصول، للعديد من دول العالم. #في_القلب_يا_مكة pic.twitter.com/b6PaN2NiTz
— وزارة الحج والعمرة (@HajMinistry) August 18, 2023
سعودي وايي چې دا پرېکړه یې نه یوازې د دې لپاره کړې چې د عمرې د ادا کوونکو لپاره اسانتیا رامنځته شي بلکې غواړي له دې لارې سیاحت یا توریزم وغوړوي.
سعودي عربستان د ویزې لپاره ۱۱۷ امریکايي ډالره فیس ټاکلی او ویلي یې دي چې په دې پیسو کې به روغتیايي بیمه هم شامله وي.