تاند: (سې شنبه، د زمري ۲۴ مه ) د طالبانو د اوبو او انرژۍ وزارت نن او سبا (د روانې مياشتې له ۲۴ څخه ۲۵ نېټې پورې) د هېواد د سیندیزو حوزو په ځینو ځایونو کې د اوبو کچې د لوړوالي او د سېلابونو د راوتلو اټکل کړی دی.
یاد شوي وزارت د یوې خبر پاڼې په خپرولو سره ویلي، چې د دغه ناڅاپي ورښتونو او سېلابونو راوتلو ډېر اټکل د (کابل) په سیندیزه حوزه کې شوی دی.
په خبرپاڼه کې همدارنګه ویل شوي، چې د سېلابونو او اوبو د کچې لوړوالی په ځانګړې توګه د جلال آباد، کنړ، لغمان، خوست، پکتیا او پکتیکا سيندونو پر لاره او ذکر شویو ځاینو په ځینې سېلبرونو کې موجود دي.
سرچینه زیاتوي:« له هغو خلکو د نوموړو سیندونو پر غاړو کې هستوګن دي، هیله کېږي، چې له یادې موضوع څخه ځانونه خبر کړي او د سېلاب د راتلو په صورت کې د سیند د غاړو اړوند او هغه خلک چې په لاندېنیو سیمو کې ژوند کوي خبر کړي؛ تر څو د ځان او خپلو ماشومانو د ساتنې لپاره د سیندونو په غاړو کې له هر ډول تګ او راتګ څخه ډډه وکړي، ترڅو د انساني او مالي زیانونو مخنیوی وشي.»
په وروستیو کې د افغانستان له بېلابېلو سیمو د ورښتونو او سېلونو له امله د درنو مالي او ځاني زیانونو خبرونه ورکړل شوي.