تاند (پنجشنبه، د اسد ۱۹ مه) د پاکستان په بیلابیلو سیمو کې د حملو په ترڅ کې لسګونه کسان وژل شوي یا ټپیان شوي دي.
پرون (چهارشنبه) د خیبرپښتونخوا په باجوړ کې په یوه ځانمرګي برید کې د ملېشه ځواک (ایف سي) لږترلږه ۵ سرتېري او دوه ملکیان ټپیان شول.
په باجوړ کې تر دې وړاندې د جولای په ۳۰ مه د جمعیت علمای اسلام ګوند په غونډه کې ځانمرګي برید لږترلږه ۶۴ تنه وژلي وو.
پرون د بلوچستان ایالت په مرکز کوټه، او د دغه ایالت په ژوب او کلات سیمو کې په درو جلا پېښو کې د چارواکو په وینا لږترلږه دوه سرتېري او درې بریدګر ووژل شول.
د بلوڅانو د ازادۍ پوځ، چې د یوه خپلواک هیواد لپاره مبارزه کوي، د کوټې او کلات کې د حملو مسوولیت منلی دی.
په کوټه کې د لاسي بم په برید کې د دوو پولیسو په ګډون پنځه کسان ژوبل شوي دي.
پولیس وايي په ژوب کې د پوځي عملیاتو په ترڅ کې نښته وشوه، چې په نتیجه کې یې درې مشکوک وسلوال ووژل شول او دوه سرتېري ژوبل شول.
د ژوبل د برید مسوولیت چا نه دی منلی. د پولیسو یوه چارواکي محمد حنیف نورزي ویلي د سې شنبې په ورځ د کلات په منګوچر کې پر سرتېرو موټرسایکل سپرو وسلوالو ډزې وکړې او دواړه یې ووژل.
په پاکستان کې د شخړو او امنیتي مطالعاتو انسټیټیوټ (پي ای سي ايس ايس) تېره میاشت په خپل شپږ میاشتنی رپور کې ویلي و، په بلوچستان کې د ۲۰۲۳ م په لومړیو شپږو میاشتو کې د ترهګرۍ ۷۵ پېښې شوي چې په کې ۱۰۰ تنه وژل شوي او ۱۶۳ نور ټپیان شوي دي.
په رپور کې ویل شوي و چې په بلوچستان کې د ۲۰۲۲ پرتله په تروریستي بریدونو کې زیاتوالی راغلی دی.
برکت، برکت