تاند: ( یکشنبه، د زمري ۸ مه ) د طالبانو خبري سرچینو ویلي، چې د دوی رژیم د خپلو امنیتي ځواکونو ۱۳ غړي چې د محرم په ورځو کې یې د ښار په ځینو سیمو کې له قانون څخه سرغړونه کړې وه او شیعه ګانو شکایت ورڅخه درلود، نیولي دي.
په افغانستان کې د سږ کال د محرم د لومړۍ لسیزې د ماتم مراسم د هېواد په یوشمېر ولایتونو او ښارونو کې د خلکو په ځانګړې توګه د ځوانانو په پراخ ګډون سره ترسره شول.
له دې سره د غزني ولایت څخه پر شیعه ګانو د طالبانو د ډزو او پکې د یو شمېر کسانو د مرګ ژوبلې خبر ورکړل شوی.
په غزني کې د طالبانو ولایتي ادارې ویلي، چې د عاشورا ورځې د نمانځونکو له منځه د دوی پر ځواکونو برید شوی او د دوی ځواکونو یې په غبرګون کې ډزې کړي.
معلومه نه ده، چې طالبانو خپل امنیتي ځواکونه په کومو ولایتونو کې نیولي او څه ډول چلند ورسره کوي.