خبريال: راحت زيارمل
وروسته له هغې چې يوه افغان ځوان په اسلام اباد کې ځانوژنه وکړه، د جولای پر ۲۴مه په اسلام اباد کې د افغان کډوالو شورا په يوه مطبوعاتي کنفرانس کې د کډوالو له نړيوالو سازمانونو او ملګرو ملتونو غوښتنه وکړه چې د افغان کډوالو پر دوسيو غور وکړي.
ذکريا بلوچ هغه افغان ځوان و چې تېره اوونۍ يې په اسلام اباد کې د کډوالۍ دوسيې له اوږده انتظار وروسته په پړي ځانوژنه وکړه. نوموړي د ملګرو ملتونو د کډوالو عالي کميشنرۍ نه د پناه او بهرنيو هېوادونو ته د بشردوستانه ويزې غوښتنه کړې وه.
۲۷ کلن ذکريا بلوڅ په سياسي علومو او حقوقو کې لوړې زده کړې کړې وې، په جمهوري نظام کې يې د څارنوالۍ د مامور په توګه دنده ترسره کړې وه او د طالبانو له دویم ځل واک ته رسېدو سره پاکستان ته د بهرنيو هېوادونو په تکل کډوال شوی و.
په اسلام اباد کې د کډوالو شورا مرستياله ثريا صبير وايي چې د ویزې لپاره اوږد انتظار، نامعلوم برخليک او اقتصادي ستونزې او ناهيلي د ذکریا د ځانوژنې لاملونه دي.
اغلې صبير د دوشنبې په ورځ وویل: «دوه کاله کېدل چې ذکریا په اسلام اباد کې د ملګرو ملتونو د کډوالوعالي کمیشنرۍ کې د پناه او د بهرنيو هېوادونو د ویزې لپاره دوسیه ثبت کړې وه خو ځواب يي نه و ترلاسه کړی».
د ځوانيمرګ ذکريا بلوچ د کورنۍ په وينا هغه د اسلام اباد په یو رستورانت کې دنده ترسره کوله خو څه موده وړاندې يې دنده پریښې وه. هغه په افغانستان کې څارنوال و چې وروسته بیا له بهرنیو ځواکونو سره يي د ژباړن په توګه دنده ومونده.
د هغه د کورنۍ په وينا کابل ته د ذکريا د مړي په انتقال کې هېچا مرسته ونکړه، يوازې د ملګرو ملتونو د کډوالو عالي کميشنرۍ استازی د غمرازۍ لپاره ورغلی و.
په اسلام اباد کې د افغان کډوالو شورا په دغه مطبوعاتي ناسته کې په پاکستان کې د پاکستاني پولیسو له ناسم چلند نه هم سر وټکاوه او ويې ويل چې ډېر ځله يې افغان کډوال د قانوني اسنادو له درلودلو سره هم ځورولي او بندیان کړي دي.
ثريا صبير وايي: « د کډوالو دوسيو ته د اړونده هېوادونو نه پاملرنه د دې لامل شوې چې په پاکستان کې افغان کډوال د قانوني اسنادو له شتون سره ځورول کېږي او له دې سربېره د اقتصادي، ټولنيزو، رواني او روغتيايي ستونزو سره لاس و ګرېوان دي».
د شورا مرستياله پر ملګرو ملتونو، د بشري حقونو نړيوالو ادارو او د کډوالۍ پر سازمانونو غږ کوي چې په پاکستان کې د نويو کډوالو د برخليک معلومولو او اړونده هېوادونو ته د لېږد په برخه کې کارونه ګړندي کړي. نوموړې وايي که د دوی دوسيو ته په وخت رسېدنه ونشي نو دا کډوال به له نورو ستونزو سره هم مخ شي.
دا لومړی ځل نه دی چې لویدیځو او نور هیوادونو ته د تګ په تمه له ناهيلۍ يو افغان ځانوژنه کوي بلکه یوه نیمه میاشت وړاندې یو بل ۲۴ کلن افغان ځوان صيام چې په انجنيرۍ کې يې لوړې زده کړې کړې وې او د کډوالۍ دوسيه يې لرله؛ هم د یوې ودانۍ له پنځم پوړ څخه په اسلام اباد کې ځان راوغورځاوه او ځانوژنه يي وکړه. د ځوانيمرګ صيام کورنۍ د ده له مرګ وروسته بيرته افغانستان ته ستنه شوه.
د ناتاييد شوو شمېرو له مخې په افغانستان کې د طالبانو له واکمنۍ وروسته ۷ ميليونه افغانان ګاونډيو هېودونو او لويديځ ته کډه شول. د کډوالۍ په دغه اوږده مزل کې تر اوسه سلګونه افغان ځوانان په لارو، سمندرونو او د پوليسو په زندانونو کې خپل ژوند له لاسه ورکړی.