تاند: ( دوشنبه، د زمري دویمه) د ړنګې شوې ولسي جرګې غړي او د ازادۍ جبهې یوه مشر عبدالستار حسیني په یوه مرکه کې د طالبانو د بلې مخالفې ډلې ملي مقاومت جبهې پر مشر احمد مسعود او پنجشېري جنرالانو توندې نیوکې وکړې.
حسیني، چې په خټه پښتون او په ولسي جرګه کې د فراه استازی و، وایي دی او د جبهې نور مشران یې د احمد مسعود او نورو پنجشېري ملګرو د ځان غوښتنې له امله یې نه دي توانېدلي، چې دوی سره وغږیږي او د طالبان خلاف د ګډ جنګي صف په برابرولو پایلې ته ورسېږي.
هغه د احمد مسعود د پلار له ستاینې سره وویل، چې احمد مسعود د احمد شاه مسعود له زوی پرته بل هېڅوک نه دی او دوی بیا- بیا پيغام ورکړی، چې ورسره کېني او د طالبانو خلاف د جګړې مشري داسې چا ته وسپاري، چې وړتیا یې لري.
حسیني د خپلې جبهې مشر د دفاع وزارت پخوانی لوی درستیز جنرال یاسین ضیا یاد کړ او ویې ویل، احمد مسعود او ملګري یې د دې لپاره چې په خبرو کې به د جګړې مشري ورڅخه د لاسه وځي، ګډ ایتلاف او خبرو ته نه کیني.
عبدالستار حسیني دا هم وویل، چې د جمهوري نظام پر مهال د پنجشېر وړې سیمې تر شپږ سوو پورې جنرالان لرل.
د هغه په باور، د دې سیمې سیاسي او جنګي مشرانو هم په تېر کې د نورو خلکو پر حق سترګې پټولې او هم اوس په همدغه لاره روان دي.
د احمد مسعود مقاومت ډلې د حسیني نیوکو ته غبرګون نه دی ښودلی.
د طالبانو پر مخالفانو نیوکه ده، چې د خپلمنځیو اختلافاتو او بې پروګرامۍ له امله تراوسه په هیڅ برخه کې د دغې حاکمې ډلې پر وړاندې په یو کیدو نه دي توانېدلي، چې دغه وضعیت طالبان نور هم د واک انحصار او پر خلکو د خپلو سلیقو تپلو ته زړور کړي دي.