خبریاله: مذلفه کاکړ
په پاکستان کې د دولتي ښوونځیو مسولان وایي چې د حکومتي لایحې له مخې دوی نه شي کولای چې د شناختي کارت نه لرونکي زده کوونکي جذب کړي. د تېرو دوه کلونو پر مهال یاد هېواد ته کډه شوي افغانان د خپلو اولادونو د تعلیم په برخه کې اندیښنه ښیي.
په راولپنډۍ کې بيا د يوه افغان له لوري یو خصوصي تعلیمي مرکز تازه په کار پیل کړی او افغان زده کوونکو لپاره ښوونیز خدمات وړاندې کوي.
د یاد ښوونیز مرکز مسوولان وایي چې دا مهال لسګونه زره افغانان په پاکستان کې د جلا وطنۍ شپې او ورځې تیروي چې په وینا یې د نورو ستونزو سربېره د زده کړو پر وړاندې پرتو خنډونو هم د یادو افغانانو ژوند سخت کړی دی. دوی وایي چې همدې اړتیا ته په کتو یې مناسبه وبلله څو د آفتاب په نوم ښوونځی پرانیزي او افغان زده کوونکو ته د زده کړو خدمات وړاندې کړي.
د دې ښوونځي مسووله فرشته هاشمي وایي: «ډیرو دلیلونو شتون درلود چې مونږ یې وهڅولو څو افغان زده کوونکو ته د زده کړو چوپړتیا وکړو، لویه انګیزه چې د آفتاب ښوونیز او علمي مرکز د جوړولو لامل شوه زده کړو ته په لوړه کچه د افغان ماشومانو لېوالتیا ده».
د دې ښوونځي یوه زده کوونکې سعیده کوثر هاشمي چې زمونږ سره یې خبرې کړي ډیره خوښه ده چې په جلا وطنۍ کې هم ورته د زده کړو فرصت په لاس ورغلی، آغلې هاشمي وویل: «زه د آفتاب ښوونځي د اووم ټولګي زده کوونکې یم، مونږ دوه کاله وشول چې پاکستان ته کډه شوي یو، په تېرو دوه کلونو کې مو د زده کړو بهیر ځنډیدلی ؤ، اوس چې بېرته پیل شو نو ډیر د خوښۍ ځای دی».
یوه بله افغان زده کوونکې چې خپل نوم نباء صدیقي ښيي وایي، درې اوونۍ وشوې چې یاد ښوونیز مرکز کې یې زده کړې پیل کړي دي. نوموړې د یاد مرکز له خدمتونو راضي بریښي: «تقریبا دوه نیمي یا درې اوونۍ وشوې چې دې ښوونیز مرکز کې مو د انګلیسي ژبې زده کړه پیل کړې، مونږ ډېر خوشاله یو چې دلته راته د زده کړو فرصت په لاس راغلی دی».
د دې ښوونیز مرکز یوه ښوونکې وایي چې دا مهال په افغانستان کې د افغان نجونو پر وړاندې تر ټولو لویه ننګونه د زده کړو د بندیز مسله ده چې په وینا یې دې ستونزې یاد قشر ډیر اندېښمن کړی دی: «لکه څنګه چې جوته ده دا مهال د افغانستان مهمه او کُلي ستونزه دا ده چې ټول ښځینه ځوان قشر ښوونځیو او پوهنتونونو ته له تګ محروم دي، اوس چې مونږ دلته افغان زده کوونکو ته د زده کړو په برخه کې کوم اقدام کړی دا به د افغان زده کوونکو لپاره ښه فرصت وي».
د یادونې وړ ده چې نږدې دوه کاله وړاندې پر کابل طالبان واکمن شول چې له هماغه پیله تر اوسه یې د ښځو پر وړاندې ځیني بنديزونه ولګول چې د یادو بنديزونو له ډلې یو یې هم د نجونو پر وړاندې د ښوونځیو او پوهنتونونو دروازې تړل دي.