تاند: ( چار شنبه، د سرطان ۲۸ مه) د ملګرو ملتونو د سرمنشي د ځانګړي استازي دفتر یوناما په کابل کې ښځینه معترضانو سره د طالبانو د ننني تشدد په اړه ژوره اندیښنه ښوده.
دغې ادارې په یوه اعلامیه کې ویلي، افغانان له تاوتریخوالي پرته په ازاده توګه د نظر څرګندونو حق لري.
یوناما د طالبانو له رژیم څخه غوښتي، چې باید خلکو ته دغه حق ورکړي.
د طالبانو ځواکونو نن چهارشنبه په کابل کې د ښځینه لاریون کوونکو د تیت و پرک کولو لپاره هوایي ډزې کړي او هم یې پر دوی اوبه پاشلي.
دغه لسګونه ښځې، د سینګارځایونو د تړل کېدو په اړه د طالبانو د پریکړې خلاف راوتې وې.
طالبانو د یاد شوي لاریون او خپل چلند په اړه څه نه دي ویلي.