تاند: ( جمعه، د سرطان ۲۳ مه) د طالبانو د کورنیو چارو وزارت د یوې ویدیو په خپرولو سره ویلي، چې د «افغانستان انټرنیشنل» ټلویزیوني شبکې یو غړی یې د منفي تبلیغاتو او جعلي راپورونو د چمتو کولو په تور نیولی.
په دې ویډیو کې تورن کس منلې، چې د افغانستان انټرنیشنل تلویزون لپاره یې جعلي راپورونه جوړول او د طالبانو خلاف یې تبلیغات ترلاسه کول.
یاد شوي تلویزون د طالبانو د دغې ادعا په اړه څه نه دي ویلي.
دغه تلویزون له لندن څخه خپرونې کوي، چې تر ډېره د طالبانو د رژیم ضد ګڼل کیږي او وخت په وخت د افغانانو ترمنځ په قومي او نورو تبعیضاتو خپرولو هم تورنیږي.
له دې سره، د طالبانو پر رژیم او ورته ویډیوګانو یې هم نیوکې موجودې دي.
د دوی منتقدان باور لري، چې طالبان د بیان ازادۍ سخت خلاف دي او د ورته ویډیوګانو د جوړولو او تورنو کسانو د اعتراف اخیستو لپاره له فشار څخه هم استفاده کوي.
طالبانو نه دي ویلي، چې نیولي تورن کس سره به څه چلند کوي او برخلیک به یې څه وی؟
د دوی په زندانونو کې د یو شمېر بندیانو خپلوان شکایت لري، چې د خپلو عزیزانو په برخلیک او ورسره د کیدونکي چلند پر اساس نه پوهیږي.