تاند:( دو شنبه ، د جوزا ۲۹ مه ) د بشري حقونو پر پراخ نقض د طالبانو د رژیم له تورنیدو سره هم مهاله، د ملګرو ملتونو د بشري حقونو شورا نن د افغانستان د بشري حقونو پر وضعیت ځانګړې غونډه لري.
تمه کیږي، چې په دې غونډه کې د دغه وضعیت په اړه بېلابېل راپورونه شریک او بحثونه وشي.
ویل شوي، چې یو شمېر افغان ښځینه فعالانې هم په یاده غونډه کې ګډون او ویناوې لري.
د طالبانو رژیم د بشري حقونو د نقض ادعاوې ردوي.
د طالبانو دفاع وزیر ملا یعقوب په یوه تازه مرکه کې وویل، چې امریکا سره د دوحې د سولې تړون کې یې د بشري حقونو د تامین کومه ژمنه نه ده کړې.
طالب ویاندویانو بیا د بشري حقونو د نقض ادعاوې بې اساسه ګڼلي دي.
له زده کړو د نجونو، له کار او ټولنیزو فعالیتونو د ښځو را ګرځول، له ټولو افغانانو د بیان ازادۍ، رایې، سیاسي او مدني حقونو سلبول او حتا تر ږیرې او لباسه یې په خصوصي حریم کې د خپلې سلیقې تحمیلول د طالب رژیم له اړخه د بشري حقونو د نقض د ادعا عمده ټکي دي.