تاند (سې شنبه، د جوزا ۲۳ مه) هندي رسنیو د خپل هیواد د حکومت په قول راپور ورکړ چې دا هیواد لږترلږه ۲۰ زره ټنه نور غنم د ایران له لارې افغانستان ته لېږي.
هند څه کم دوه کاله پخوا افغانستان ته د پنځوس زره ټنه غنمو مرسته وکړه.
د ټایمز اف انډیا ورځپاڼې د راپور له مخې، دا نوې مرسته به د ایران د چاه بهار له لارې افغانستان ته ولیږل شي ځکه چې تېر ځل پاکستان افغانستان ته د هند د مرستو د لېږلو په لار کې ډیر خنډونه جوړ کړل.
تمه کېږي چې د هند د تازه مرستې لومړۍ جوپه، چې دوه نیم زره ټنه غنم دي، روانه اوونۍ د چاه بهار بندر له لارې افغانستان ته راورسیږي.
دا به سږ کال د هند د غنمو لومړۍ مرسته وي.
په وروستیو کې د هند د باندنیو چارو وزیر ایس جې شنکر وویل، په افغانستان کې د هند تمرکز اوس پر سیاست لږ دی او د افغانانو ملاتړ او په ځانګړي ډول له هغوی سره تاریخي اړیکو ته ډېر دی.
د هند د باندنیو چارو وزیر دا هم وویل چې د طالبانو له واک ته رسېدو وروسته یې خپل ډیپلوماتان له افغانستانه په دې خاطر وایستل چې امنیتي اندېښنه یې لرله او دا کار ډېرو نورو هېوادونو هم وکړ، خو د وخت په تېرېدو یې خپل تخنیکي ټیم بېرته سفارت ته واستاوه، دوی له څه مودې راهیسې هلته دي او دنده یې تر یوه حده دا ده چې حالات له نږدې و ارزوي او وګوري چې څرنګه هند په هغه څه کې له افغانانو سره مرسته کولی شي چې هغوی ورته اړتیا لري.
د خوړو د نړیوال پروګرام پر اساس، په افغانستان کې د هغو کسانو شمېر چې د خوراکي موادو مرستو ته شدیده اړتیا لري، تر ۲۹ میلیونو اوښتی دی.
هندوستان د تل آباد او د ګران او سرلوړي افغانستان دوست او ملګری وي . دوست هغه دی ، چې په سختو ورځو کې ستاسو له حال نه ځان خبروي او د ضرورت په وخت کې مرسته درسره کوي .
پرهغوی چې ځان ظاهرا مسلمان ګڼي ، خو له تاسو سره د نورو د مرستو مخه نیسي ، لعنت وي .