تاند:( یکشنبه ، د جوزا ۲۱ مه ) د طالبانو د رژیم ویاند ذبیح الله مجاهد د دوی د رژیم په اړه د ملګرو ملتونو د امنیت شورا تازه راپور رد کړ.
په دغه راپور کې د طالبانو د رژیم په اړه بېلابېل تورونه لګول شوي.
د واک انحصاري کول او قومي کول، د مخالفانو ځپل، له ملا هبت الله سره د سراج الدین حقاني او ملا یعقوب ژور اختلافات او نور موارد د یاد شوي راپور مهم تورونه دي.
د طالبانو ویاند دا راپور یو اړخیز ګڼلی او ویلي، چې پر واقعیتونو ولاړ نه دی.
د طالبانو یو شمېر مخالفانو بیا د دغه راپور هرکلی کړی او ویلي، چې د افغانستان د وضعیت واقعیت یې وړاندې کړی.
له دې سره، دا راپور خاصتاً د طالبانو د قومي چلند د ادعا له مخې توندو غبرګونونو سره مخ شوی او ویل شوي، چې په دغه راپور کې دا ادعا کاملاً ناسم دی.