تاند:( شنبه ، د جوزا ۲۰ مه ) د طالبانو د کورنیو چارو وزیر سراج الدین حقاني پرون شمالي ولایتونو ته د سفر په ترڅ کې د جوزجان ولایت دشت لیلي ته سفر کړی.
نوموړي د دغه سفر پر مهال، په دشت لیلي کې، د طالبانو د وژل شویو جنګیالیو لپاره دعا وکړه او دوی یې « د تاریخ نوم ورکي اتلان» وګڼل.
د طالبانو د تېر رژیم د سقوط پر مهال په دشت لیلي کې د دوی او عبدالرشید دوستم د ملېشو ترمنځ سختې جګړې وشوې، چې په پایله کې یې زرګونه طالبان د دوستم له لوري اسیران او بیا یې د وژل کیدو خبرونه ورکړل شول.
طالبانو تراوسه په دغه دښته کې د خپلو جنګیالیو د ډله ییزې وژنې ادعاوې مستند کړي نه دي، چې له امله یې د دوی مشران تر سختو نیوکو لاندې دي.
دوستم د یادو وژنو له امله په نړیواله کچه په بشري جنایتونو تورن شوی.
د دوستم پلویانو ادعا لرله، چې طالبانو هم د دوی اسیران وژلي وو او د طالبانو په لیکو کې پنجابیان هم شامل وو.
د دشت لیلي د جنګي جنایتونو قضیه تراوسه پورې ډېره نه ده مستند شوې.