تاند:( چار شنبه ، د جوزا ۱۷ مه ) داعش ډلې د بدخشان لپاره د طالبانو د سرپرست والي نثار احمد احمدي د وژل کیدو مسوولیت هم پر غاړه واخیست.
احمدي پرون د بدخشان ولایت په مرکز فیض اباد کې د ځانمرګي برید پر مهال ووژل شو.
داعش ډلې نورو طالب چارواکو ته هم د ورته بریدونو خبرداری ورکړی.
یادې ډلې شاوخوا څلور میاشتې مخکې د بلخ لپاره د طالبانو د والي مولوي داود مزمل د وژل کیدو مسوولیت هم پر غاړه اخیستی و.
طالبانو د دغې پېښې د عاملینو په اړه څه نه دي ویلي، خو په افغانستان کې یې د داعش ډلې حضور او قوت تل رد کړی.
د سیمې یو شمېر هېوادونه هم په افغانستان کې د یادې ډلې د موجودیت اندیښنه لري، خو طالبان یې اندیښنې بې ځایه بولي.