تاند:( یکشنبه ، د جوزا ۱۴ مه ) د سرپل په سانچارک ولسوالۍ کې له تېرو دوو ورځو راهیسې لسګونه نجونې مسمومې شوې دي.
د سرپل د اطلاعاتو او کلتور لپاره د طالبانو د رژيم رئیس عمیر سرپلي تایید کړه چې د سانچارک ولسوالۍ په دوو لیرې پرتو ښوونځیو کې یو شمېر ښځینه زده کوونکي او ښوونکي مسمومې شوي دي.
هغه زياته کړه، چې په يوه ښوونځي کې ٦٠ نجونې او ښوونکي او په بل ښوونځي کې ١٧ ښځينه زده کوونکي مسمومې شوي دي.
هغه زياته کړه، چې په دې پېښه کې چاته مرګ ژوبله نه ده اوښتې، خو يو شمېر ټپيان د سرپل ولايتي روغتون ته لېږدول شوي دي. د هغه په وينا، ښايي دا د “کومې شبکې” کار وي او يا هم کومه “شخصي ستونزه” وه.
د سرپل يوه بل ځايي طالب چارواکي چې نه يې غوښتل نوم يې واخيستل شي رسنیو ته وويل: “د سانچارک ولسوالۍ په اب کلان او فيض اباد کې د دوو ښوونځيو زده کوونکي مسموم شوي، د مسموم شويو کسانو لامل او وروستۍ شمېره معلومه نه ده.” په سیمه کې شتون لري او تر څیړنې لاندې دي.”
په افغانستان کې د زده کوونکو مسمومېدل بې ساري نه دي. د تېر حکومت په دوره کې په بېلابېلو ولايتونو کې د ښځينه محصلينو د مسمومېدو ډېرې پېښې ثبت شوې وې. په هغه وخت کې چارواکو طالبان د محصلینو د مسمومولو مسوول بللی و.
ډیره ظالمانه کړنه ده، ممکن د طالب د تشکیلاتو ځینی کړیانو دا کار تر سره کړی وی.
باید توضیحات ورګړه سی چی آیا دا مسمومیت د خوړو له لیاری را منځته سوی دی او که کوم سمّی ګاز ماز کاروَل سویدی؟