تاند:( چار شنبه ، د جوزا ۱۰ مه ) د طالبانو د رژيم چارواکو هغه راپورونه رد کړي، چې ګواکې ایران سره یې د اسلام کلا په بندر کې د پوځي تیارسئ حالت رامنځته شوی دی.
د هرات لپاره د طالبانو د والي ویاند نثار احمد الیاس ویلي،چې په پوله کې کومه ځانګړې موضوع نه ده رامنځته شوې.
د هغه په وینا، د اسلام کلا په بندر کې سوداګري هم په عادي بڼه روانه ده او کومه بله د اندیښنې وړ موضوع هم نشته.
له پرون راهیسې یو شمېر رسنیو خبر ورکړی، چې اسلام کلا کې ایران او طالبانو دواړو ټانګونه او اضافي تجهیزات ځای پرځای کړي دي.
د ایران رسمي خبري اژانس د خپلو چارواکو له قوله په دې اړه څه نه دي ویلي، خو د طالبانو د دغه ویاند له خولې یې یاد شوی خبر خپور کړی.
د ایران او طالبانو اړیکې په وروستیو کې ترینګلې شوي، چې طالبانو ته د ایران د خبرداري له امله د طالبانو یو شمېر منتقدانو هم د دوی څنګ نیولی او ایران ته یې د افغان خاورې پر لور د کاږه نه کتلو خبرداری ورکړی.
څو ورځې مخکې په اسلام کلا کې د طالبانو او ایران د پوله ساتونکو نښته کې یو ایرانی او دوه طالب پوله ساتونکي وژل شوي وو.