تاند:( سې شنبه ، د جوزا دویمه ) د هندوستان په مختلفو پوهنتونونو کې افغان محصلان، چې اوس په افغانستان کې ایسار پاتې دي، د هندوستان لخوا د ویزو له نه ورکول کیدو شکایت لري.
دوی وایي، چې د کرونا ویروس له شدت سره افغانستان ته په رخصت تللي وو، خو وروسته د افغان نظام د سقوط له امله هند د دوی د ویزو د نوي کولو غوښتنه نه ده منلې.
هندوستان پر دغو افغان محصلانو سربېره، په خپله خاوره کې د مېشتو افغان محصلانو ویزې هم لغوه کړې وې، چې توندو نیوکو سره مخ شو.
په هندوستان کې د افغان محصلانو د حقونو د دفاع یو شمېر بنسټونو د محصلانو په پلوۍ انلاین عدالت غوښتنه پيل کړې او هندي چارواکي افغان محصلانو ته د ویزې ورکولو لپاره هڅوي.
دوی خبرداری ورکوي، چې د افغان محصلانو د ویزو ځنډ د هغوی تحصیلي فرصت او وخت ضایع کوي.
هندي چارواکو په دې اړه څه نه دي ویلي.
هندوستان، چې افغانانو د پاکستان له ضده هم د ملګري په سترګه ورته کتل، د جمهوري نظام له سقوط وروسته د افغان خطر ځپلو د نه لاسنیوي او طالبانو سره د ژر نیږدې کیدو له امله د افغانانو په عامه ذهنیت کې متنفر شوی او د پخوا په شان په ښه سترګه نه ورته کتل کیږي.