تاند:( شنبه ، د غویي ۲۳ ) په بهرنیو چارو کې د پاکستان د دولت وزیره حنا رباني وایي، د طالبانو رژیم سره یې د هېواد د تعامل شرط دا دی، چې دوی به د افغانستان خاوره د پاکستان د تحریک طالبان په ګټه او د دوی په تاوان استعمالیدو ته نه پریږدي.
نوموړې له جیونیوز سره په مرکه کې وویل: « طالبانو سره چې اوس په افغانستان کې واکمن دی، زموږ تعامل د همدغه شرط پر بنسټ دی. د هغوی لهخوا موږ ته ویل کېږي چې موږ پر دې باور یوو چې په پاکستان کې د هېچا وینه توی نهشي، خو دا یوازې د خبرو تر بریده ده. هغوی باید ځينې شیان ثابت کړي، ځکه موږ هم د پاکستان د طالبانو له تحریک سره د مبارزې توان لرو.»
له دې سره هم مهاله، د طالبانو د ویاند مرستیال بلال کریمي یو ځل بیا په افغانستان کې د پاکستاني طالبانو د تحریک حضور بېبنسټه ګڼي او ټينګار کوي چې د افغانستان له خاورې به هېڅ هېواد ته ګواښ پېښ نهشي.
د حنا رباني څرګندونې په داسې حال کې دي، چې د طالبانو د بهرنیو چارو وزارت سرپرست ملا امیر خان متقي تېره اونۍ اسلاماباد ته په خپل سفر کې د دغه هېواد له لوی درستیز سره په کتنه کې، د سیمهییز امنیت، د پولو د مدیریت او د پاکستاني طالبانو د تحریک د ګواښونو په تړاو خبرې وکړې.
متقي وروسته په کابل کې وویل، چې له چین او پاکستان سره یې یوه ګډه اعلامیه صادره کړه او پکې ویل شوي، چې د هیڅ هېواد به د یو بل خلاف نه کارول کیږي.
وروسته د چین د بهرنیو چارو وزیر وویل، چې طالب لوري د افغانستان له خاورې د دوی خلاف د نه استفادې لیکلی سند ورکړی او تعهد ورسره شوی، چې د ختیځ ترکستان ډله به له افغان خاورې د دوی خلاف کار نه اخلي.
معلومه نه ده، چې ورته تعهد طالبانو پاکستان ته هم ورکړی کنه؟
طالبان چی دا ګرنتی دخپلی انا ته ورکوی چی د هیڅ پاکستانی وینه به نه تویزی نو دا د افغان مظلوم ملت وینه چی تویزی ناموس د پاکستان په زندانو کښی پراته دی او څوک نشته چی د دی یهود پرسته حکومت ته غږاوچت کړی څوک به یې ګرنتی کړی له دی معلومیږی چی طالب د افغانستان نه ده او افغان ملت ورته دښمن ښکاری او د پاکستان دال خوارو باندی سخت خوابدی کیږی