تاند:( سې شنبه ، د غویي ۱۲ )  راپورونه وايي، چې د طالبانو د رژیم د بهرنیو چارو وزیر مولوي امیرخان متقي روانه اونۍ د پاکستان پلازمېنې اسلام اباد ته په رسمي سفر ځي.

دا سفر د قطر په مرکز دوحه کې د ملګرو ملتونو د سرمنشي انتونیو ګوتریش په مشرۍ د افغانستان په اړه د غونډې له جوړیدو وروسته ترسره کیږي.

 په دې غونډه کې پر ګوترش سربېره د ۲۵ هېوادونو او نړیوالو سازمانونو استازي هم ګډون لري.

ځینو سرچینو ویلي، چې د دغې غونډې پر مهال ملګري ملتونه د طالبانو د رژیم د په رسمیت پېژندلو په اړه د بېلابېلو هېوادونو له استازو سره خبرې کوي.

تمه کیږي، چې د غونډې ګډونوال به طالبانو ته د رسمیت پېژندلو لپاره خپل اصول په ډاګه کړي.

په دې غونډه کې د طالبانو د رژیم کوم استازی ګډون نه لري، خو ځینو پاکستاني رسنیو او د طالبانو منتقدانو ادعا کړې، چې د طالبانو استازیتوب په غیر مستقیم ډول د پاکستان د بهرنیو چارو وزارت مرستیاله حنا رباني کهر کوي.

افغان سیاسي فعاله ظریفه غفاري وایي، چې پاکستان ته د ملا متقي د سفر هدف دا دی څو د حنا رباني کهرله خولې د دوحې غونډې پریکړې واوري.

نوموړې پر خپلې ټویټر پاڼې لیکلي: ((له بده مرغه ټالیبانو د افغانستان عظمت دومره ټیټ کړ، چې همدا نن په قطر کې د ملګرو ملتونو په ناسته کې د افغانستان استازولي  حنا رباني کهر کوي او راتلونکې جمعه به امیر خان متقي اسلام آباد ته په چارتر الوتکه کې سفر ولري، له خپلې وزیرې نه به د قطر د ناستې اړوند نوي هدایتونه او لارښوونې تر لاسه کړي تر څو د پاکستان په پنځمه صوبه (افغانستان) کې یې پلي کړي.))

طالبانو د متقي د دغه سفر په اړه څه نه دي ویلي.

دا په داسې حال کې ده، چې د حسن عباس په نوم پاکستاني څېړونکي په یوه تازه کتاب کې ادعا کړې، چې د ملا متقي په ګډون د طالبانو د رژيم د ګڼو مشرانو کورونه پاکستان کې دي او دوی د خپلو کورنیو د لیدو تر څنګ له پاکستاني چارواکو څخه د دستور اخیستو لپاره په چارتر الوتکو کې پاکستان ته منظم پټ سفرونه لري.