تاند(پنجشنبه، د ثور ۷) ټاکل شوې ده چې د ملګروملتو امنیت شورا نن (پنجشنبه) د ملګروملتو د ښځینه کارکوونکو پر کاربندیز وغندي او د طالبانو له حکومته وغواړي د ښځو او نجونو خلاف خپل اقدامات سمدلاسه پای ته ورسوي.
په دې اړه د ملګروملتو د پرېکړه لیک مسوده، چې ټاکل شوې ده نن رایې پرې واخیستل شي، د متحده عربي اماراتو او جاپان له لوري وړاندې شوې او یوه کاپي یې رویټرز خبري اژانس ترلاسه کړې ده.
د پرېکړه لیک په دې مسوده کې د طالبانو له لوري د ښځو او نجونو خلاف بندیزونه د ملګروملتو په ټول تاریخ کې بې ساري بلل شوي او د افغانستان په ټولنه کې د ښځو پر رول ټینګار شوی دی.
د رویټرز خبري اژانس د راپور له مخې، دیپلوماتان وايي، پوره باور لري چې دا پرېکړه لیک به په یوه خوله تصویب شي.
په هغه صورت کې د پرېکړه لیک په توګه تصویبېدای شي چې د امنیت شورا له ۱۵ دایمي او غیردایمي غړیو څخه یې ۹ غړي تایید کړي خو شرط دا دی چې د امنیت شورا په پنځړ دایمي غړیو له لوري ویټو نه شي.
امریکا، روسیه، بریتانیا، فرانسه او چین د امنیت شورا دایمي غړي دي.
په مسوده کې ویل شوي د ملګروملتو لپاره پر کارکوونکو ښځو د کار بندیز د بشري حقونو او او بشري اصولو سرغړونه ده.