تاند:( شنبه ، د حمل ۲۶ ) د افغانستان د سولې بهیر لپاره د امریکا متحده ایالاتو ځانګړي استازي ټام ویسټ د افغانستان په اړوند خبرو لپاره د قطر پلازمېنې دوحې ته تللی.
نوموړي په خپله ټویټر پاڼه کې د یاد شوي هېواد له صدراعظم ډاکټر مطلق القحطاني سره د لیدنې او خبرو خبر ورکړی.
ویسټ په خپل ټویټ کې قطر خپل ستراتیژیک ملګری بللی او ویلي، چې دواړه هېوادونه په افغانستان کې د امریکا د ګټو د ساتنې او د خلکو له حقونو د دفاع لپاره کار کوي.
په ورته مهال، د افغانستان د بهرنیو چارو وزارت پخواني سیاسی مرستیال حکمت خیل کرزي له ویسټ سره د لیدنې خبر ورکړی.
خلیل کرزي په دغه لیدنه کې د نجونو د زده کړو د ژر پيل، د ښځو د دندو د بیرته پيل او د ملي خبرو د ترسره کیدو پر اړتیا د بحث خبر ورکړی.
ویل کیږي، چې ویسټ به له دوحې څخه ترکیې ته هم ځي او هلته به یو شمېر طالب ضدو سیاسي څېرو سره ویني.
د امریکا د ورته هڅو په اړه افغانان خوشبینه نه ښکاري، ځکه په باور یې دغه هېواد له یوه لوري د طالبانو په بیا واکمنولو کې اصلي رول درلود او په عین حال کې اوس د طالبانو او مخالفانو دواړو ملاتړ یې کوي.