تاند:( سې شنبه ، د حمل ۲۲ ) په زابل کې د پيغام په نامه يوې خصوصي راډیو خپل نشرات پيل کړل.
د دغه راډيو د نشراتو مسئول روحالله حکيمي وايي، چې د يادې راډيو په نشراتي پاليسۍ کې يې د دغه ولايت د اوسېدونکو کلتوري او ټولنيزو غوښتنو ته ځای ورکړی دی.
زابل د هېواد په سوېلي زون کې يواځينی ولايت دی، چې د طالبانو له واکمنېدو راهيسې پکې يوه رسنۍ فعاليت پيلوي.
د طالبانو له بیا واکمنیدو سره، د افغانستان سلګونه رسنۍ تړل شوي او زرګونه خبریالان د هغو ادعاوو له امله، چې د طالبانو له لاسه د دوی د نه خوندیتوب په اړه یې لري، هېواد پریښودو ته اړ شوي.
طالبان بیا د بیان ازادۍ د درناوي ادعا کوي، خو ټینګار کوي چې دغه ازادي باید د شریعت په چوکاټ کې وي.
د طالبانو منتقدین باور لري، چې طالب رژیم د شریعت د چوکاټ په نوم هر هغه څه، چې د دوی نه وي خوښ، تکفیروي او خلکو ته ستونزې جوړوي.