تاند:( دوشنبه ، د حمل ۲۱ ) د طالبانو د لوړو زده کړو وزیر مولوي ندامحمد ندیم د یو شمېر دیني مدرسو مسوولین تورن کړي، چې د لیسانس سند د ترلاسه کولو لپاره د خپل فراغت جعلي اسناد وېشي.
نوموړي په دې اړه نور جزیات نه دي ورکړي، خو خبرداری یې ورکړی چې د دا ډول کړنو عاملان به نیول کیږي او قانوني چلند به ورسره کیږي.
د طالبانو له بیا واکمنیدو سره اعلان شوی، چې دغه ډله د مدرسو د لویو دورو فارغانو ته د پوهنتونونو د لیسانس اسناد ورکوي.
له دې سره ویل کیږي، چې ډېرو خلکو د یادو اسنادو ترلاسه کولو ته مخه کړې او هڅه کوي د مدرسو په جعلي اسنادو د لیسانس اسناد واخلي.
د تعلیمي چارو کارپوهان د طالبانو یاده پریکړه تحصیلي نظام سره جفا بولي او زیاتوي، چې دا پریکړه د جهادي تنظیمونو له هغو پریکړو سره ورته ده، چې خپلو جنګیالیو ته یې پوځي رتبې ورکولې او ماشیني جنرالان او پوځي منسوبین یې زیاتول.