تاند:( شنبه ، د حمل ۱۹ ) د هلمند لپاره د طالبانو ځایي چارواکو ویلي، چې تېره اونۍ په دغه ولایت کې د بېلابېو جنایي، ترافیکي پېښو او خپلمنځیو شخړو له امله ۲ تنه وژل شوي او ۱۱ نور ټپيان شوي دي.
د طالبانو د اعلامیې له مخې، د هلمند په موسی قلعه، سنګین، ګرمسېر، ناوه، نادعلي او مارجې ولسوالیو کې په اوو پېښو کې ۲ تنه وژل شوي او ۶ تنه نور ژوبل شوي دي.
سرچینه دغه راز وایي، چې تېره اونۍ د هلمند په ناوه، موسی قلعه، سنګین، او ګرمسېر ولسوالیو کي د ۸ ترافیکي پېښو له امله ۵ تنه ژوبل شوي دي.
چارواکو په دې اړه نور جزیات نه دي ورکړي.
د طالبانو پر چارواکو نیوکه کیږي، چې د پېښو او مسایلو په اړه معلومات په ډېر ځنډ رسنیو سره شریکوي.