تاند:( جمعه، د حمل ۱۸ ) په بلخ کې د طالبانو ځایي چارواکو د سوالګرو د را ټولولو د کمپاین د پيلولو خبر ورکړی.
ځایي چارواکو ویلي، چې په دې اړه یې له بېلابېلو ادارو ګډ کمیسیون جوړ کړی.
طالبانو مخکې په کابل کې هم د سلګونه زرو سوالګرو د را ټولولو، چاڼ او بیا یې مستحقو سره د میاشتینیو مرستو خبر ورکړی و.
د طالبانو دا چاره د هرکلي ترڅنګ نیوکو سره هم مخ شوې ده.
پلویان یې وایي، چې د سوالګرو په لباس کې نامستحقه خلک هم شته، خو منتقدان یې وایي طالب رژیم ټول افغانان سوال ته کینولي، خو په داسې نمایشي کړنو هڅه کوي ځان مسوول او د خلکو وضعیت ته متوجه وښيي.
طالبان که څه هم په کور دننه د سوالګرو ستونزو ته د خپلې پاملرنې ادعاوې کوي، خو ځینې چارواکي یې په خاص ډول د سرې میاشتې مشرتابه له ډېرو هېوادونو غوښتي چې د سوالګرو د ملاتړ لپاره مرستې ورسره وکړي.