تاند:( چار شنبه، د حمل ۱۶ ) د طالبانو د رژیم ماليې وزارت، د دولتي املاکو په عوايدو کې د پام وړ زياتوالي خبر ورکړي دی.
دغه وزارت د يوې خبرپاڼې په خپرولو سره ويلي: د دولتي املاکو لوی رياست په عوايدو کې د پام وړ زياتوالی راغلی، چې د ۱۴۰۱ مالي کال په بهير کې، د مرکزي جايدادونو له درکه ۳۶۸ ميليونه افغانۍ او د ولايتي جايدادونو له درکه يو ميليارډه ۸۵۵ ميليونه افغانۍ عوايد راټول شوي .
سرچینه زیاتوي، چې د ياد رياست په عوايدو کې دغه زياتوالی له فساد سره د مبارزې، پر وخت د خدمتونو د وړاندې کولو، د مسلکي او ژمنو کادرونو د ګومارنې او د شفافې داوطلبۍ په پايله کې راغلي دي.
د طالبانو دا څرګندونې په داسې حال کې دي، چې خلک د دوی له لوري د مالیو او ټیکسونو له زیاتیدو شکایت کوي.