تاند:( دوشنبه، د حمل ۱۴ ) د طالبانو د اوبو او انرژۍ وزارت واکمنانو، نن په ۱۴۰۱ مالي کال کې د خپلو د کړنو او فعالیتونو راپور له رسنیو سره، شریک کړ.
د دوی په وینا، د ناتمامو پروژو د کار دوام، د امو سیند د سواحلو تحکیم لپاره د اړینو تدابیرو نیول، د حقوقي اسنادو توحید، تحلیل او ترتیب، د پانګونو د جلبولو لپاره د زمینې برابرول او د تفاهم لیکونو لاسلیکول؛ په وروستي یوه کال کې د دغه وزارت له مهمو اجرااتو څخه دي.
د اوبو او انرژۍ وزارت لپاره د طالبانو د رژیم مرستیال، مجیب الرحمن عمر آخندزاده وویل: د ۱۴۰۱ مالي کال پر مهال، د هلمند د کجکي بند د دویم فاز د لومړۍ برخې عملي کار بشپړ شوی، د نیمروز کمال خان بند د درېیم فاز، د کابل د شاه او عروس بند، د زابل د توري بند او په تخار کې د نمک آب کانال په اوږدو کې د دریاچې د اصلاح پروژې کار دوام لري.
د دغه طالب مقام په خبره، د هرات د پاشدان بند او د فراه د بخش آباد بند د لومړۍ برخې چارو دوام لري او د بندونو او کانالونو د ساتنې او څارنې ۱۰ وړې پروژې هم تطبیق شوي دي.
د نوموړي د معلوماتو له مخې، د اموسیند سواحلو د تحکیم هر اړخیزه سروې تر سره شوې او اوسمهال د بلخ، کندز، جوزجان او تخار ولایتونو په ۱۴ ساحو کې د تحکیم کارۍ چارې روانې دي.
طالب چارواکي زیاتوي، وروستي یوه کال کې د هلمند سیند معاهدې د تطبیق په اړه له ایراني لوري سره، پرله پسې ناستې شوي، د سیندیزو حوزو په اړه هر اړخیزه مطالعه تر سره شوې، د لسګونو پروژو تخنیکي سروې، طرحې او ډیزاینونه ارزول شوي دي او حقوقي اسناد هم توحید او تحلیل شوي دي.
د وزارت د معلومات له مخې، د اوبیزو څاګانو د ځای ټاکلو په موخه، ۶۰۴ هایدروجیولوجیکي سروې ګانې تر سره شوي، د ځمکلاندې اوبو د سرچینو تقویت لپاره جذبي څاګانې کیندل شوي، د سطحي اوبو د سرچینو شمېرې راټولې شوي او په پنځه سیندیزو حوزو کې د اوبو ختلو د خطرونو برخه کې نقشې چمتو او تکثیر شوي دي.
د مسوولینو په خبره، د چارو د لا ښه تنظیم په موخه، ۱۰ تخنیکي کړنلارې تر منظورۍ وروسته، اړوندو ادارو ته لېږل شوي، ۶ مقررې تسوید شوي او له UNICEF,GIZ,WFP,FAO او JICA سره پرله پسې ناستې شوي دي.
له تاجیکستان، اوزبیکستان او ترکمنستان سره د برېښنا قرارداد تمدید، له خصوصي شرکتونو سره د ۳ تفاهم لیکونو لاسلیکول د کورنیو او بهرنیو پانګونو د جلبولو لپاره د زمینې برابرول؛ په ۱۴۰۱ کال کې د دغه وزارت له نورو کړنو دي، چې چارواکو یې یادونه کړې ده.
دا په داسې حال کې ده، چې د طالبانو منتقدان د حکومت له مسلکي ادارو څخه د کادرونو ویستل او پر ځای یې د طالب ملایانو او جنګي قومندانانو ګومارل د داسې پروژو د کار د تطبیق پر وړاندې لوی خنډ بولي.