تاند:( پنجشنبه، د حمل ۳) د بریتانیا د بهرنیو چارو وزارت په افغانستان کې امنیتي وضعیت بې ثباته بللی او خبرداری یې ورکړی، چې د روژې په میاشت کې د هوايي ډګرونو او مذهبي ځایونو په ګډون د هېواد په بېلابېلو سیمو کې د ترهګریزو بریدونو خطر شته.
د بریتانیا د بهرنیو چارو وزارت په یوه خبرپاڼه کې ویلي: په افغانستان کې د برتانوي اتباعو د نیول کېدو خطر ډېر دی.
خبرپاڼې بریتانیاوي اتباعو ته خبرداری ورکړی، چې اوس مهال په افغانستان کې د برتانیې قونسلګرۍ مامور نشته او د بهرنیو چارو وزارت د قونسلګرۍ د مرستې وړتیا په جدي ډول محدوده ده.
د بريتانيا د بهرنيو چارو وزارت زیاته کړې: که چيرې بريتانوي اتباع په افغانستان کې بنديان شي، ښايي د اوږدې مودې لپاره بندي شي او لندن خبر نه شي، په عين حال کې د دې ضمانت نشته چې له خپلو کورنيو سره به اړيکې ونيسي.
په دې اعلامیې کې برتانوي اتباعو ته سپارښتنه شوې چې د مذهبي مراسمو په ګډون عامه غونډو او پیښو ته نږدې نه شي او افغانستان ته د سفر په صورت کې دې احتیاطي تدابیر ونیسي.
په افغانستان کې د طالبانو حاکم رژیم په دې اړه څه نه دي ویلي.
بریتانیا د نړی یواځینی ملک دی، چه د ۲۰۰ کالو را په دیخوا یی افغانستان تباه تباه کړه. لمړنی جګړی د افغانستان په خلکو دغه پلیتو انګریزانو شروع کړیدی، د ډیورنډ د غیر رسمی پولی جنجال چه پښتانه یی په دوو جلا برخو وویشل او بیا یی د پاکستان په نوم یو هیواد د شیطانت او خپلو اهدافو دعملی کولو په خاطر جوړ کړه.
لنډه دا چه افغانان باید خپل دغه ټول عمری دشمن وپیژنی. اسرایل د فلسطین او بریتانیا یا انګریز د افغانستان ټول عمری دشمن دی.
د انګریز دا ډول څرګندونی په حقیقت کی د فریب او چم سیاست دی یعنی غواړی د افغانستان د اوسنی خواګرځن وضعیت د منځته راوړلو د اتهام څخه ځانته برائت حاصل کړی.
بله دا چی د انګریز پیش بینی ( د روژی په میاشت کی د تروریسټی حملو احتمال ) په عامه اذهانو کی ډیری پوښتنی زیږولای سی.