تاند:( سې شنبه، د حمل لومړۍ) د پښتون ژغورنې غورځنګ مشر منظور پشتين د بلوچستان په لورالايي کې یوې پراخې غونډې ته د وینا پر مهال په پښتونخوا او نورو سيمو کې د نامنۍ تازه پېښو ته په اشارې سره وويل چې استعماري قوتونو يو وار بيا دې سيمې ته نوی جنګ راوړی، په اتفاق به یې مخنیوي کيږي.
هغه وویل، ”استعماري قوتونه لګيا دي چې دې خاورې ته يې نوې اسلحې راوړې دي، نوي طرزونه راوړي دي، نوی ترتيب يې جوړ کړی دی، زمونږ او ستاسو په وينو يې ډالر وګټل، مونږ په هيڅ قيمت پر خپله خاوره نا امني نه منو، او د هغې د مخ نيوي لپاره يې هر قيمت ادا کولو ته تيار يو، دې مخنيوی يوازې په اتفاق کيږي او چې پښتانه په اتفاق شي بيا يې ماتې نا ممکنه ده”.
د پښتون ژغورنې غورځنګ مخکښ او د پاکستان د پارلمان غړي علي وزير له څه کم دوه کاله بند راخوشي کېدو په وياړ جوړه شوې دې ولسي غونډې کې له بېلا بېلو سيمو څخه په زرګونه نارينه او ډيری ښځينه فعالو ګډون درلود.
علي وزير وويل د پښتنواو افغانونو پر وطن له تېرو څو لسيزو را هيسې جنګونه روان دی، لا هم دا لړۍ روانه ده.
”د دې وطن د هر فکر رنګ قام او قبيل خلک له ترهګرۍ سره مخ شوی، اوس وخت راغلی دی چې ټول سره يو شو”.
منظوﺭ پشتين وويل، په پاکستان کې د پښتنو سر خوندي دی نه يې وسايل خوندي دي, منظوﺭ پشتين په خپله وينا کې ﺯياته کړه, د پښتنو پر وطن تر ترتيب شوي پلان لاندې نا امني جوړه کړل شوې او له هم دې کبله د پښتنو وطن او وجود له خطر سره مخ دی.
ښاغلي پشتين وويل، چې د پښتانه وکيلان ووژل شوه، د پښتنو مشران وژل شوي خو د هغوی له کورنيو سره انصاف نه دی شوی.
پشتين وويل، پښتون وطن د دنيا له وسايلو ډک دی خو اختيار يې نه لري او له حکومت څخه يوه کوڅه او پوخ سړک په سوال غواړي.
په وروستیو کې د پښتون ژغورنې غورځنګ له لوري د زرګونه پښتنو د انسجام او د پاکستان د پښتون ضدو سیاستونو خلاف هڅې ګړندي شوي.