تاند:( پنج شنبه، د کب ۲۵) د هندوستان سینما( بالیووډ) په سویلي اسیا کې د فحاشۍ په تر ټولو ستر مرکز( هیرامنډيي) چې د پاکستان په لاهور کې دی، ځانګړی سریال جوړ کړی.
دغه سریال مشهورې هندۍ فلم جوړونکې سنجې لیلا بهنسالي جوړکړی.
په دغه سریال کې د پاکستان د بدلمنو او نڅاګرو میرمنو کیسې وړاندې کیږي.
دا سریال به د نیټفلکس شرکت له خوا خپور شي خو تر اوسه یې د خپریدو دقیق تاریخ معلوم نه دی.
هیرامنډیي چې یو وخت شاهي او د نڅا او اواز بازار و او وروسته د تن پلورنې په بدنام بازار بدل شو، په لاهور ښار کې لعل جومات ته نږدې موقعیت لري.
په دې سریال کې په ۱۹۴۰ لسیزه کې د نڅا پر کوټو او د تن پلورنې پر هغو ځایونو تمرکز شوی کله چې لاهور د هند یوه برخه وه او پاکستان لا رامنځ ته شوی نه و.
په دې سریال کې د سوناکشي سنها، ادیټي راو حیدري، منیشا کویرالا په شان وتلو هنرمندانو نقش لوبولی دی.
بهنسالي چې د پدماوت، باجیراومستاني او همدل دېچکې صنم په شان فلمونو له امله مشهوره ده، تیره میاشت په ممبایي ښار کې ددې سریال پرانیسته وکړه.
د هیرامنډيي سریال د لاهور په هیرامنډيي کې د تن پلورونکو په درېیو نسلونو متمرکز دی.
په سریال کې په هیرامنډيي کې د تن پلورونکو میرمنو د مینې، خیانت، بریا او سیاست داستان په تصویر راکاږل شوی دی.
په دې سریال کې به د ازادۍ لپاره د بدلمنو میرمنو هڅې او د پاکستان د رامنځ ته کیدو څرنګوالی هم نندارې ته وړاندې شي.
پاکستان د دغه سریال په اړه غبرګون نه دی ښودلی.
د هیرا منډيي له نامه سره افغانان هم په پراخه کچه اشنا دي او ډېر ځله پاکستان پلوو خلکو ته یې د پېغور په توګه یادوي.