تاند:( یکشنبه، د کب ۲۱) د داعش یا اسلامي دولت سخت دریځې ډلې خراسان څانګې د مزار شریف په تبیان فرهنګي مرکز کې د پرونۍ چاودنې مسوولیت ومانه.
په دې برید کې د طالبانو په وینا یو تن وژل شوی او د خبریالانو په ګډون اته نور ټپیان شوي، خو د رسنیو ملاتړو بنسټونو بیا د وژل شویو شمېر ۳ او د ټپي خبریالانو شمېر ۱۶ بللی دی.
داعش د تیلګرام په خواله رسنۍ کې په خپل چاینل کې ویلي چې دا برید دوی کړی دی.
تر دې دوه ورځې وړاندې داعش د بلخ لپاره د طالبانو د والي داوود مزمل د وژلو مسوولیت منلی و.
د بلخ والي د ولایت په مقام کې په انتحاري برید کې له دوو نورو کسانو سره ووژل شو.
له بلې خوا د افغانستان لپاره د واشنګټن ځانګړي استازي توماس ویسټ او د خبریالانو د حقونو د دفاع ګڼو بنسټونو په بلخ ولایت کې پر خبریالانو پرونۍ چاودنه، وغندله.
د افغانستان د بشري حقونو لپاره د ملګرو ملتونو ځانګړي راپور ورکوونکي ریچارد بنیت هم په دې اړه په یوه ټویټ کې ویلي، چې د تبیان په فرهنګي مرکز کې د شوې چاودنې پېښه له نږدې څاري.
د بلخ لپاره د طالبانو امنیې قومندانۍ بیا ویلي، چې د یادې چاودنې په تور یې د تبیان فرهنګي مرکز مسوولین نیولي او بندیان کړي.
طالبانو دغه مسوولین په دې پړه ګڼلي، چې په دغه مرکز کې یې د خبریالانو د ستاینې لپاره جوړه شوې غونډه د دوی د امنیتي مسوولینو له خبرولو پرته جوړه کړې وه.