تاند (چهارشنبه، د حوت ۱۰مه) د افغانستان د پاسپورت ریاست په یوه خبرپاڼه کې اعلان وکړ چې سر له نن څخه یې د پارسپورټ د وېش بهیر پیل کړ.
د دغه ریاست له خبرپاڼې سره سم، په اوسني پړاو کې هغو کسانو ته پاسپورت ورکول کېږي چې انلاین فورمې یې ثبت کړي دي.
د پاسپورټ ريیس عبدالکریم حسیب تېره اوونۍ په یوه خبري غونډه کې ویلي و چې د حوت له لسمې څخه به د پاسپورت د وېش بهیر بیا پیل شي.
د طالبانو له واک ته رسیدو وروسته څو ځلې د پاسپورت د توزیع بهیر ځنډول شوی دی. په عین حال کې په دې اداره کې د فساد د شته والي ادعاوې شوي دي.
خو د پاسپورت ريیس ښاغلی حسیب وايي چې اداره یې د فساد، واسطې او د جعلي پاسپورتونو د مخنیوي تکل کړی دی او په دې اړه پر خپله ژمنه ولاړه ده.
د پاسپورت د وېش بهیر وروستی ځل د میزان په ۱۶ مه ځنډول شوی و. طالب چارواکو یې دلیل تخنیکي ستونزې بللې وې.