تاند: ( جمعه، د حوت ۵ ) د اروپايي ټولنې د بهرنۍ تګلارې مسوول “جوزف بوریل” د ملګرو ملتونو د عمومي غونډې په څنډه کې وویل چې د طالبانو د رژیم د مشرانو ترمنځ ډېر اختلافونه شته او دوی له دغو اختلافونو څخه پر دوی د فشار راوستو او اصلاحاتو لپاره ګټه اخلي.
د اروپایي ټولنې دغه مسوول دا هم وویل چې له مدني ټولنې سره زموږ اړیکې او د افغانانو ملاتړ باید دوام ومومي.
د اروپايي ټولنې دغه چارواکي ویلي، چې پر طالبانو د سیاسي او اقتصادي فشار راوستل یو ستونزمن او نازک توازن دی، خو دوی هڅه کوي د دوی له خپلمنځیو اختلافاتو ګټه واخلي.
هغه وويل: “د سياسي او اقتصادي فشارونو په اړه زما اندېښنه دا ده چې څوک به اغېزمن شي، ځکه چې که سبا له افغانستان سره د نادولتي موسسو له لارې چې اساسي اړتياوې برابروي ټولې مالي مرستې لغوه کړو، خلک اغېزمنیږي او زه نه غواړم چې د دې هېواد خلک دوه ځلې مجازات شي..” نو موږ باید طالبانو ته سزا ورکړو».
د بوریل د څرګندونو په اړه د طالبانو ادارې تر اوسه کوم غبرګون نه دی ښودلی.
د طالبانو د ادارې د ویاند “ذبیح الله مجاهد” په ګډون ګڼو طالب چارواکو د دوی ترمنځ د اختلافاتو راپورونه بې ځایه تبلیغات ګڼلي دي.