تاند (جمعه، د دلوې ۲۸ مه) پاکستاني چارواکي د امنیتي سرچینو په قول ادعا کوي چې د کراچۍ د پولیسو پر عمومي قوماندانۍ وسله وال برید د درو حمله کوونکو له وژل کېدو وروسته پای ته رسیدلی دی.
د سیند ایالت د حکومت ویندوی مرتضي وهاب پر خپله ټویټرپاڼه په ځايي وخت د شپې په لس بجې او ۴۲ دقیقو ولیکل چې په کراچۍ کې د پولیسو پر عمومي قوماندانۍ برید له درې نیمو ساعتونو وروسته پای ته رسیدلی دی:
«تاییدولی شم چې د کراچۍ د پولیسو د دفتر ودانۍ تصفیه شوې ده. درې ترهګر وژل شوي دي.»
I can confirm that so far there have been 2 casualties & 11 are injured being treated at the hospital. One injured person is critical & is being attended to. Prayers for everyone
— Murtaza Wahab Siddiqui (@murtazawahab1) February 17, 2023
ده له دې جلا له جیونیوز تلویزیون سره په خبرو کې وویل چې ودانۍ اوس خوندي ده خو بم شنډوونکي پلټنې کوي چې ایا په هغو واسکټونو کې چاودونکي مواد شته او که نه شته چې حمله کوونکو اغوستي وو.
ده په دې برید کې د درو امنیتي ځواکونو وژل کېدا تایید کړه.
په سیند ایالت کې د پوځ ویندوی بیا ویلي چې عملیات یې بشپړ کړي او اوس دوی تصفیې ته دوام ورکوي.
په همدې حال کې ډان ورځپاڼې راپور ورکړی چې د کراچۍ په فیصل واټ کې له ۸ تر ۱۰ حمله کوونکي د ماښام په ۷ بجې او ۱۰ دقیقې د پولیسو د مرکزي قوماندانۍ ترڅنګ یوې ۵ منزله ودانۍ ته ننول او پر پولیسو یې برید پیل کړ.
ټي ټي پي یا د پاکستاني طالبانو د دې برید مسوولیت منلی دی.