تاند: ( جمعه، د دلوې ۲۸مه) په ننګرهار کې د طالبانو د والي دفتر وایي، چې په دغه ولایت کې یې له ولسي خلکو څخه د تاریخي اثارو په نوم د کورونو نیولې ۴۲قلمه لوښي بیرته خپلو خاوندانو ته سپارلي دي.
د دغه دفتر په یوه اعلامیه کې د ننګرهار د موزیم لپاره د طالبانو د آمر قاري زینت الله ځیرک له قوله راغلي:(( دغه توکي چې په کې لباسونه برنجي او د مسين بنګړي برنجي کوزې، تورې، ډول ډول پولي او داسې نور په کې شامل وو د ننګرهار د امنیي قومندانې د پولیسو له خوا څو میاشتې وړاندې نیول شوي وو او بیا یې اطلاعاتو کلتور ریاست ته سپارلي وو.))
د موزیم آمر قاري ځیرک وویل، چې یاد شوي توکي د تاریخي اثارو پیژندونکو د څیړنو وروسته معلومه شوه چې دغه توکي تاریخي نه دي.
د هغه په وینا، په همدې خاطر دغه توکي اصلي خاوندانو ته بیرته وسپارل شول.
د طالبانو چارواکو ویلي، چې د تاریخي اثارو د قاچاق او حیف و میل د مخنیوي لپاره جدي دي او چا ته په دې برخه کې د خپلسرۍ اجازه نه ورکوي.