تاند: (سې شنبه، د دلوې ۲۵مه) د بادغیس لپاره د طالبانو امنیتي مسوولین وایي، چې د دغه ولایت په آبکمري ولسوالۍ کې د لاسي بم د چاودنې له امله دوه ماشومان مړه شوي دي.
د دغه ولایت د امنیې قومندانۍ ویاند صديق الله صادقي وویل، چې دغه پېښه د آبکمري ولسوالۍ د آغک کلي په يوه پوسته کې هغه وخت رامنځته شوه، چې دغه ماشومان د اوسپنې د زړو ټوټو په راټولولو بوخت وو.
نوموړي زیاته کړه، چې دغه پوسته له دې وړاندې د جګړو پرمهال ویجاړه شوې وه.
په افغانستان کې د زړو اوسپنو په ګومان له ډېره وخته بېوزله ماشومان ناچاوده توکيو ته لاس ور وړي، چې د مړينې سبب یی ګرځي.
د اقتصادي او بشري ناورين له شدت سره، افغانستان کې پر ماشومانو شاقه کارۍ او نورې ستونزې هم زياتې شوي دي.